Myndlistaskólinn á Akureyri býður upp á hnitmiðað 39 eininga heildstætt nám í sjónlistum veturinn 2011-2012. Námið er skipulagt með hliðsjón af aðalnámskrá framhaldsskóla og í því felst listrænn og tæknilegur undirbúningur fyrir framhaldsnám á sviði myndlistar, hönnunar og arkitektúrs.
Umsókn um skólavist þarf að berast skólanum fyrir 3. júní nk. ásamt umbeðnum gögnum og tilskyldum fjölda eigin myndverka. Sérstök inntökunefnd fjallar um umsóknir og ákvarðar um inntöku. Inntökunefnd áskilur sér rétt til að boða umsækjendur til viðtals dagana 3. til 7. júní, telji hún ástæðu til. Við inntöku er tekið tillit til fyrra náms og starfsreynslu. Auk þess eru innsend verk umsækjenda metin af inntökunefnd skólans. Miðað er við að umsækjandi hafi lokið a.m.k. 104 einingum í framhaldsskóla eða hliðstæðu námi sem inntökunefnd metur gilt.
Myndlistaskólinn á Akureyri er lítill en góður sjálfstæður skóli með sterkan prófíl sem reynir eftir föngum að laða til sín hæfileikaríka einstaklinga og skapa þeim skilyrði til að þroskast og ná árangri. Markmiðið er að mennta fagfólk með sterkan grunn sem tilbúið er til að takast á við verkefni framtíðarinnar. Námið er einstaklingsmiðað og sveigjanlegt. Skólinn leggur áherslu á að fá sérfræðinga, gott fagfólk og snjalla myndlistamenn til að koma inn og vinna með nemendum að tilteknum verkefnum.
Aðstaðan í skólanum er mjög góð og stenst samanburð við það besta í heiminum. Skólinn kappkostar að vera vel samkeppnishæfur með því að búa vel að starfinu í skólanum.
Inntökuskilyrði
Við inntöku nemenda í fornámsdeild er tekið tillit til almennrar menntunar, fyrra náms og starfsreynslu. Skilyrði fyrir inngöngu í skólann er að umsækjandi hafi lokið a.m.k. þriggja ára námi í framhaldsskóla (104 einingar) eða öðru sambærilegu námi sem skólinn metur gilt. Auk þess eru innsend verk umsækjenda metin af inntökunefnd skólans og á grundvelli þeirra og innsendra gagna er valið úr. Umsóknarfrestur er til 3. júní 2011. Inntökunefnd áskilur sér rétt til að boða umsækjendur til viðtals dagana 3.–7. júní.
A. Staðfest vottorð um fyrra nám.
B. Myndverk sem umsækjandi hefur sjálfur gert á s.l. 2-3 árum. Hámarksstærð A2 (42-60 sm). Ef um stærri verk er að ræða eða þrívíð, skal senda ljósmyndir. Æskilegur fjöldi 10 - 15 verk.
Þegar inntökunefnd hefur lokið störfum er umsækjendum tilkynnt um niðurstöðuna en síðan ber þeim sem fá inngöngu að staðfesta umsóknina með því að greiða staðfestingargjald kr. 45.000 fyrir 23. júní. Staðfestingargjald er óafturkræft. Seinnihluti skólagjalds fyrir haust- og vormisseri er kr. 270.000 og greiðist 1. september.
Nám í fornámsdeild er skipulagt samkvæmt námsskrá framhaldsskóla. Nemendur í fornámsdeild þurfa að ljúka 38 einingum á skólaárinu og ljúka hverjum áfanga með fullnægjandi árangri til að fá hann metinn til eininga og einkunna. Nemendur geta bætt við valáföngum og fengið þá metna.
